玩物壯志 鏢手人生 軟式飛鏢

<原文:壹週刊 2013-08-29>

近年興起玩軟式飛鏢,鏢靶得分區顏色不同之餘,體積亦較大;因較易得分,吸引不少人士參與玩埋一份。

 

鏢手人生 軟式飛鏢

好多人都以為飛鏢只是一種「酒吧玩意」,鏢來鏢往的意義只不過是用來獎罰一杯幾瓶啤酒而已。不過,原來飛鏢這玩意,背後存在大道理,有世界級飛鏢手仲話,玩飛鏢甚至可以改寫人的一生。

急功近利

Royden  38歲香港首位職業飛鏢手, 2003年甫出道即獲全港飛鏢公開賽冠軍, 2011年自費往日本參加國際賽 MJ Tournament 2011,獲個人賽冠軍。上星期代表香港,出戰在上海舉行的 2013國際飛鏢聯合會世界盃。截稿當日,已知獲雙人組季軍。

 

單睇外表,肯定誤會 Royden好難相處,事關訪問未埋位,只見他坐在一旁緊閉雙唇不發一語, cool爆。<br />想不到一開口,完全是另一回事:說話慢條斯理,每講一句要解釋三次,長氣到極,原本預定一小時的訪問,足足做了三個多小時,連他都自覺不好意思,「我係長氣咗少少。」

實在難以想像,自稱說話囉嗦的 Royden,竟然自爆從前性格急躁兼自大,「打波游水瓣瓣掂,自細已經代表學校比賽拎冠軍。講嘢做事都唔理人感受,自我感覺良好就得,就算俾人誤會都唔想解釋。」現在可以鏢鏢中紅心的他,表示從前根本無人生目標,「畢業後冇份工做得長,好多時衰衝動,郁吓就辭職唔撈,原本諗過做廚師,但做落又好快冇興趣。」

鬥氣死練

2010年曾到日本參加比賽,可惜屈居亞軍,翌年捲土重來,最終奪冠而回。(圖片由 Royden提供)

 

最後是飛鏢改寫了他的人生,「有次同班朋友到酒吧玩飛鏢,初初接觸當然唔中目標,我當然唔服氣,死都要學識。」心有不甘,唯有晚晚練鏢,「一日練足八個鐘,工都冇心機返。」日練夜練,肩膊出事,痛到差點想放棄,「但又唔想衰俾人睇。」痛定思痛,唯有查找不足,「痛嘅原因好簡單,只係錯用死力,當放鬆番個膊頭,原來掟得仲遠仲準。」結果練多了三個月,「練到指邊格就射中邊格!」 2003年首次參加公開賽,得到全港總冠軍。

提起這段威水史,他沒有飄飄然,反而開始質疑自己,「細個贏獎牌贏到冇晒感覺,反而拎飛鏢冠軍,返到屋企坐定定諗番,發現原來仲有好多改善空間。」

以鏢為喻

他從中得出結論,飛鏢取勝之道,不是技術,而是心態,「飛鏢好講求集中力,企喺比賽場上,好多環境因素影響到準頭,如果心態上失衡,就算技術幾好都發揮唔到,老套啲講,贏輸都係自己。我醒覺到以前待人處事,好易受情緒影響,變得好衝動同唔顧後果,輕則輸咗比賽,重則連人品都輸埋。試過有對手落後緊幾分,就發脾氣講粗口,結果唔單只輸咗比賽,背後仲俾人鬧冇品。」

簡單到從揸鏢姿勢, Royden都話「領悟到嘢」,「其實飛鏢有過百種揸法,冇話邊種姿勢最標準,總之掟中紅心就係好鏢。正如做醫生、律師都未必係『標準答案』,我做職業飛鏢手,都可以有出頭天。」

在 Facebook記錄低曾去過比賽的地方,他說如果當日揀了做廚師,就未必有出外見識的機會。

 

在飛鏢場上學懂輸了比賽都要贏到友誼,仲同好多外國鏢手成為朋友,身旁二人是日本代表。(圖片由 Royden提供)
Royden話揸鏢同做人一樣,不需要刻意學其他人,做好自己都可以成功。

私竇鏢場

Kenneth  40+歲飛鏢發燒友,發燒到要買部飛鏢機私藏,可惜苦無門路,最後親身飛到美國,向當地生產商租到七部機來港,並在荃灣開設飛鏢道場「 Woody Workshop」招呼同好。

隨着本地好多飛鏢手衝出香港,令飛鏢愈來愈為人認識,今時今日,不只得酒吧有得玩,於旺角及尖沙咀等樓上鋪,都開設了不少俗稱「道場」的飛鏢場,因場中不售賣酒精類飲品,吸引了不少年輕人光顧。

但玩到好似 Kenneth要自建私家鏢場,都算經典, Kenneth說:「飛鏢從前係酒吧玩意,不過酒吧消費都幾高,當初我喺酒吧接觸到飛鏢,一玩就上晒癮,每次去酒吧都要花一千幾百先落到樓;之後去道場玩,每局俾五蚊,玩兩個鐘都要百幾蚊!」

小數怕長計,索性自設飛鏢道場,供自己練鏢。不過向各家生產商敲門就處處碰壁,「現時香港最常見嘅飛鏢機都係由日本同韓國出產,每部約售十萬,但都係得網上早期出產嘅易手貨,想玩全新機,就只能夠以公司名義,向廠方租用,月租幾千蚊,仲要拆一半賬先得。」

結果,搵到去美國先有廠方答應,租到七部電子機,放在荃灣工廠區私竇,「廠方事前都講到明,飛鏢機不接受私藏,但我真心想自己玩,唯有賣大包,喺工廈月花幾千蚊租個單位,只收五十蚊入場費俾公眾全日任玩,反正都冇諗過賺錢。」

點計分?

飛鏢歷史,最早可追溯到羅馬帝國時代(公元前 27年),羅馬軍人將弓箭簡化,當作軍中閒時玩意。直至 19世紀末期,英國人 Brian Gamlin就確立了現代飛鏢計分方法,主要是將鏢靶劃分為 20個得分區,分別為 1至 20分。外圈的窄環可得雙倍分數,中間的窄環得三倍分。正中紅心區分數為 50分,其外圍的綠色窄環區域則為 25分。

賽制則採扣分制,以 301分玩法為例,兩位鏢手輪流投擲,每回合各掟三鏢,最快將分數由 301分扣至 0分就贏,不過,最後一鏢(埋鏢)的得分不能比剩餘分數多。其後,經過不同演化,仲增設名為「 double in、 double out」(即開局及埋局都要命中雙倍窄環)等玩法。

鏢靶懸掛亦有限制,規定正中紅心距地面高度為 1.73米, 20分區應位於上方。投擲線為距離鏢靶平面 2.37米處。

裝備篇

飛鏢的鏢靶,分為硬式鏢靶與軟式鏢靶,因採用不同物料,例如硬式鏢靶通常以木質、麻質與特殊纖維製成;軟式鏢靶則採用各種塑膠材質,以致用的鏢都有不同。

飛鏢構造

一支飛鏢由鏢尖、鏢身、鏢桿和鏢尾四個部分構成,其中最主要的部分就是鏢尾,它是決定飛鏢投擲時的速度及角度的最關鍵因素。國際比賽規定飛鏢的總體長度不得超過 30.5cm,重量不得超過 50g,軟式飛鏢重量不得超過 20g。

大 Flight

設計上受風阻影響較高,雖然出鏢後的速度較慢,但較易控制射出角度,而且射中目標不易脫落,從而影響得分。

普通 Flight

最適合新手的設計,好處是速度、拋物線角度適中,較易控制,不過射出角度較難作精細調校。

水滴/棺材 Flight

射出速度最快,拋物線弧度最小,但較易因太大力而令飛鏢脫落,只適合高手使用。

鏢靶有大細

硬式同軟式鏢靶最大分別是鏢靶的直徑,硬式鏢靶直徑約為 15.5吋,而軟式鏢靶直徑約為 13.5吋,得分區設計則一模一樣。

電子鏢分類

Kenneth話現時香港玩得到的電子飛鏢,大致分為四種,分別由美、日及韓國研發,雖然得分區同玩法都一模一樣,但勝在功能各有不同,內置不同特色的小遊戲。

介面華麗

日本 Dartslive2( D2)

特色:由日本遊戲廠 Sega生產的機種,是可連線同世界各地飛鏢手作即時比賽,積分可儲存在選手 IC卡上,上網就查到目前的排名。內置小遊戲較多,可以用遊戲得分來購買模擬人物的背景、動畫等。而且飛鏢的地台比其他牌子高約 1吋,射鏢距離亦相應較遠。

網上賭分

韓國 Phoenix

特色:同 D2機性質相近,亦可上網對戰及儲存積分,但最大分別是機內置賭分制,可用積分與網上對戰者對賭,勝出後贏取對手的積分。

專業級

美國 Medalist

特色:不設網上即時對戰,而且鏢機較小音效及背景音樂,鏢靶介面比較簡單,背景亦沒有太多燈光效果,中、高階鏢手反而讚不會影響集中力。

古董派

美國 Arachnid(蜘蛛機)

特色:最舊式的鏢機,除了電子計分外,介面較為簡陋,沒有網上儲分制度,因此漸受淘汰。

 

撰文:林梓添

攝影:陳健邦、許朝暉

插圖:王健威

Leave a Reply

%d bloggers like this: